Seleccionar página
Miguel Baptista (Muge – Portugal, 1995) nova fichaxe do Frigoríficos do Morrazo para a tempada 2020/21 na Liga Sacyr Asobal. Trátase dun lateral dereito que chega cedido por unha campaña polo FC Porto e que a tempada pasada xa disputou a Liga Asobal nas filas do Viveros Herol Bm. Nava.

En primeiro lugar queremos agradecer ao FC Porto, especialmente ao “professor” Magalhaes, ás facilidades para que esta cesión se puidese levar a cabo. Estamos moi satisfeitos de que esta relación Cangas-Porto siga fortalecéndose despois da tamén frutífera incorporación de Ruben Ribeiro no pasado Nadal.

A pesar da súa xuventude (25 anos) Miguel xa ten unha ampla traxectoria no balonmán profesional xogando en equipos como o Chartres da Proligue francesa e na liga portuguesa; no Avanca primeiro e nas filas do ABC Braga despois, co que anotou 105 goles antes de recalar no conxunto segoviano.

É un xogador sólido e moi completo en todas as facetas do xogo, destaca especialmente a súa capacidade defensiva, e que a pesar da súa estatura (196cm) ademais de lanzamento exterior tamén é capaz de facer xogar os demais compañeiros.

Coa incorporación de Miguel Baptista reforzamos o lateral dereito que compartirá con Martín Gayo e pechamos o equipo que loitará un ano máis pola permanencia na Liga Sacyr Asobal.

“Bemvido” Miguel, desexamos que te sintas en Cangas como na túa casa e que nos fagas gozar do teu xogo en O Gatañal.

Inicio